Gansir Tawon Ngaji Tri Guna Upaya

Gangsir karo Tawon

Sinau Tri Guna Upaya

Gangsir yen urip kudu dewe, dewean, ndewe

Tawon yen urip bareng, mbareng lan mbarengi

Gangsir yen bareng mesti padudon, gelut, mati

Tawon yen dipisah mesti mati



Kabes wis pepestening gusti.

Minangka gusti utawa pemimpin kudu ngerti

Sipate rakyat sing dikewulani.

Mula kudu ngaji paham marang Tri Guna Upaya

Tri guna upaya tegese telung perkara nyaketake antarane gusti lawan rakyate

Rupa upaya tegese gusti iku kudu appal marang rupa rakyate

Wamsa upaya tegese gusti iku kudu ngerti tata laksana rakyate adat istiadat
paugeran umat

Guna upaya tegese gusti iku kudu ngerti marang sepira daya kapinterane 
kewulane.



Semarang 7 April 2014
Pojok Lor Wetan Gedung Pandanaran(Ki Gula Klapa)

Grimis Kapisan

tuwukna tangismu kanggo nelesi lemah
nela lan suwe tan kejamah
tangan lan jiwa prakosa
wetokna kabeh luh lan kringet-mu
kanggo nyuburake gumuk lan sawah bengkah
wis suwe suket-suket teki, ngranti
tekane biyung dimen bali nyusoni bayi
kanggo katresnan sejati
dhuh biyang

wis wancine ngurupake dimar pepadhang
sawise bayi-bayi padha ngelak getihe kadhang

lumantar grimis riwis-riwis
gowok-gowok garing bisa kisenan banyu bening
sawangen kae wiji-wiji padha semi
ing pasrene ati kang wening


2002

Sumber : KUMPULAN GEGURITAN "Bocah Cilik Diuber Srengenge"

Udan Tengah Wengi

nyawang tlethike udan tengah wengi
kaya nyawang Guernica pating blasah
ing jrambah, aku adhep-adhepan
tanpa obah
kok suguhake glathi
kanggo nyacah daging mentah
geneya adam lan hawa mudhun bumi
nggawa ati semplah?


Surabaya,2001

Sumber : KUMPULAN GEGURITAN "Bocah Cilik Diuber Srengenge"

Sapu Panebah

sapu sada gumlethak ing kasur
ora obah ora mosik
garising nasib kaya wis diatur
tresna wis melahi
nalika raga dlujur
ginambar ing sprei
rupa dasamuka,arjuna,srikandi lan sembadra
apa durga ;an bethara kala

sapu sada dadi panebah
nebah dhadha
ngilangi lumut lan langese jiwa

karah,2007

Sumber : KUMPULAN GEGURITAN "Bocah Cilik Diuber Srengenge"

Manjing Rasa

beninge rasa rinasa
ing uritaning panembah
wiji suci sumarah
sangu talanging sedya
ngebaki sajadah
mbruwah turah-turah

nyandhi donga rinasa
trubus dadi wulu 
dadi kuku
dadi daging
dadi kulit
dadi balung
dadi sungsum
dadi gonging panguripan

ing wekas wis tanpa pungkas
mung ninggal tilas
manjing rasa rinasa
sukma lan raga wis tak prabeda
apa jatine ana lan ora ana?

2007

Sumber : KUMPULAN GEGURITAN"Bocah Cilik Diuber Srengenge"

Geguritan "LAMUS,LAMUR,LAMUK"

Pleret… pet !
Panyawange katon peteng ndhedhet
Pangrasane rasa sepi nyenyet
Salira mangsa bodhoa
Meneng…
Anteng…
Hamung sumeleh rasa ing dhadha

Pleret… pet
Lamus-lamus pucuking netra
Dadya lamur sira anyawang
Dene lamuk anjujug ora bisa disadhang

Geneya?
Kabeh padha jenggiratan
Apa krana lamus, lamur, lan lamuk sing padha pasingsetan?
Ya… bisa wae, sabab kataraKrana wayah saya pleret
Sabab sumber daya anjlok ora katulungan

www.http://basajawibudayaku.blogspot.com

Geguritan "ENGGALING JAGAD"

Sampun katata rapi

Jarik kajiret mubeng

Sido mukti laurikke

Pratandha lelorone panggih

Alon endah lumakune

Tumapak ing tlatah abang

Mengkana wus kasambut

Arupa DEWI SINTA

Paes ireng kang nggambari

Ayuning wanguning rai

Kasandhing dening RAMA

Lumampah marang enggaling jagad

www.http://basajawibudayaku.blogspot.com

MEMITRAN

Rana-rene bebarengan

awan bengi tansah rumaket

Kaya mimi lan mintuna

Ora kena dipisah

Yen ana mimi mesthi ana mintuna

Yen ana mintuna mesthi ana mimi

Saben dina sangsaya rumaket

Kaya tan ana gela

Nadyan iku mung sandiwara

www.cintajawaku.blogspot.com

PANGUDARASA

Cahyamu sumunu mbalerengi
Mubyar pindha agni
Nora panas nggegirisi
Kepara édhum hanentremi
Wèh sengsem jroning ati

Cipta kumlawé ngrengkuh karsa
Mulat rasa lebdèng pitaya
Tanpa pepoyan lumaksana
Neluk was sumelang tidha-tidha
Jumangkah ngranggèh èsthining sedya

Ngaurip lamun padha ngretiya
Lebda jiwa kang prayoga
Sikep darana sarwa prasaja
Pratéla sokur kinucap saben mangsa

Dadya sassadara anggung madhangi
Dadya tari setya lila anganthi
Sayuk reruntung amberkahi
Ngayahi kardi kanth sukèng ati

Tilamwangi, ésuk 03022014

www.fiksi.kompasiana.blogspot.com

MBARANG

Bocah cilik manis, kakang adhi

Runtang-runtung nyang endi-endi

Nyangking angklung saka bumbung

Mlebu lurung metu lurung

Bocah cilik kendhana-kendhini

Runtang-runtung mbarang saparan-paran

Ngupa boga nyambung panguripan sadulitan

Nambal nistha sing lungka teka wira-wiri

Nrenyuhi

Nembangi lagu-lagu memelasi

Mbukak babad ngenesi ati

Kocatan bapa biyunge dheweke tininggal keri

Bocah cilik kendhana-kendhini

Runtang-runtung nyang endi-endi

Dina-dina uripe kalipat ayang-ayange mega

www.cintajawaku.blogspot.com

WUNGWANG

Kidung wengi ngrangin dak rungu

Ngungak tresna langgeng

Sukma langgeng

Jiwa langgeng

Ana siji sing kari

Keris ligan manjing manjer

Ing tawang towang

Dalan lan napasgumeter geter

Sadawaning panyawang

                                                (Surabaya,1987)

Sumber : Kumpulan Gguritan “BOCAH CILIK DIUBER SRENGENGE”

JAGAD NYAWIJI

Sapa sing ngirid ketege jantungku

Tumuju jagad kang sinengker

Ing sepi samun,nalika

Awakku kari sak-klentheng lumebu

Bolongane kuping-Mu

Jagad dadi

Nyawiji ing garis sandhi

Apa bedane buta gedhe lan cilik

Apa bedane karep lan pepengi an

Apa werdine ombak lan segara

Apa tilase antarane ana

Lan ora ana

Nyatane mung  kari slira-Mu

Ijen

Kang tan bisa kinayangapa

                                                                (Januari 2008)

Sumber : Kumpulan Gguritan “BOCAH CILIK DIUBER SRENGENGE”

Jagade Gonjang-Ganjing

Dak sebut jagade gonjang-ganjing

Amarga akeh kang ora padha eling

Marang liyan, apa maneh marang sing gawe gesang

Wong gedhe padha jegal-jegalan

Rebutan panggonan lan panguwasan

        Ewadene wong cilik padha gedhungsangan

        Golek pangan panguripan

        Sing ndhuwur saya mulur

        Sing ngisor saya thekor

        Pancen jagade lagi gonjang-ganjing

Akeh kang padha ngedan

Yen ora edan padha ora keduman

Padha ndugang-dinugang

Singkang-singkangan

        Ilang rasa kamanungsan

Lumrahe wae gusti paring samubarang pepeling

Maneka bebendu: lindhu, petir, angin, udan, ora uwis-uwis

Supaya manungsa padha eling

Dening: Prembayun Miji Lestari, S.S M. hum

Sumber : Buku ajar bahasa jawa “fokus”

www.belajarbahasajawa2013.wordpress.com

Geguritan "Album"

ALBUM

Dhipan iki wis nglantarake

Prau-prau tumuju samodra

Nalika aku dhewe emple sumendhe

Ngrajut impen

Rina lan wengi

Sangu lampu senthire simbah

Ing panembah

Dhipan iki dadi seksi

Lungide lakon sang bima

Ginubed naga suci

Aum!

                                                                2008

Sumber : Kumpulan Geguritan “ Bocah Cilik Diuber Srengenge”

Geguritan "Pasuryan Ayu Ibuku"

PASURYAN AYU IBUKU

Sunar lan renungan sing tak waca ning nduwur watu

Ngenani ayune pasuryan ibuku

Ana garis werna saka pasuryan iku

Nyritakake jamanku lugu awujud lagu

Pasuryan ayu ibuku

Ing padharan iku aku tau nunut turu

Nganti aku nesep susu

Dadi getih mili ning awakku

Piwalesku namung donga nganti kegawa tekan mimpiku

Pasuryan ayu ibuku, mesti ana ing ngendi aku

www.sastrajawabesar.blogspot.com

Geguritan "Bocah Cilik Diuber Srengenge"

BOCAH CILIK DIUBER SRENGENGE

Bocah cilik dauber srengenge

Niba tangi sadawaning dalan

Suwe-suwe srengenge diuntal

Ceblok ing peturone

Yen ta sawise tangi

Srengenge wis ora ana sandhinge

Ateges impen iku dadi kasunyatan

Srengenge pancen manjer

Delengan katon kuning mrusuh ing imbang wetan

Delengan manuk jalak padha ngoceh

Kekeceh cahya

Bocah cilik dauber srengenge

Sawise mau bengi dadi bantale

                                                                2008

Sumber : Kumpulan Geguritan “ Bocah Cilik Diuber Srengenge”

Geguritan "Lelaku"

LELAKU

Geneya kudu oyak-oyakan

Yen tundhone mung kudu antri,

Nunggu kompal-kampule kapal

Kanyatane aku lank owe ora ana

Bedane, padha gumantung tumpangan

Ora ana kang wani kumalungkung ngungalake dadha

Jalaran lelaku padha

Tundhone melu gumuruh

Lamun bendhe tinabuh

Geneya kudu angluh

Yen mercusuar mung ndamar mancung

Nggret ati cupet

Tumuju pulo-pulo seje

Nganti ngentir mili ngeli

Nyabrang samodra bawera

Nurut dawane wengi

Papan kang kudu dituju

Tansah samun dinulu

Lha njur apa bedane

Sesuk apa saiki wae!

Bali,

Geneya iline prau ing getihku

Nuju getihmu?

                                                              (Surabaya-Bali, 1999)

Sumber : Kumpulan Geguritan “Bocah Cilik Diuber Srengenge”

Geguritan

“Geguritan”

Kanggo Sliramu

Kapang iki kanggo sapa

Nalika wewayanganmu wae wis ora ketara

Tresna iki kanggo sapa

Nalika ragamu wae saikiwis adoh saka driya

Kasunyatane

Sliramu saiki wis lali

Wis ora eling maneh dalan-adalan kang nate kapecak

Wis ora eling maneh nalika sliramu tanpa rowang

Wis ora eling maneh yen aku yen aku kang tansah setya

Patang taun kepungkur sliramu iku sapa

Lan saiki wis dadi apa

Nanging mangertya,

Kapang lan tresnaku tetep isih ana

Cumondhok ing sajroning nala

Senajan sliramu wis cidra

                                                (Romdonah)

Dudu Ajaran

Saiki jaman edan

Yen ra edan ora keduman

Une-unen kuwi guyonan apa tenanan

Sing mesthi dudu iklan

Urip kuwi kudu prigel, ana ing gaweyan

Iki dudu dolanan

Manungsa aja mung ngetokake kaapikan

Sing ala di umpetake, wedi yen konangan

Sandhang, pangan lan papan aja dadi kautaman

Sing katon mung kerakusan

Sing jane di utamakake kuwi akure tetanggan

Iki dudu wejangan

Lan dudu pangarepan apa maneh ajaran

Iki mung omongan, manungsa kang ora weruhan

Nanging nduweni rasa kang diwujudake gremengan

                                                (Usman Hanafi)

Sumber : Panjebar Semangat