Tari Bambangan Cakil yaiku salah sawijining tari klasik ing Jawa khususé
ing Jawa Tengah. Sakbeneré tari iki kajupuk saka salah sawijining
adegan ing pakeliran wayang yaiku adhegan Perang Kembang. Tari
iki nyritakaké perang antarané sing becik klawan sing ala, ing kéné digambaraké
antarané Ksatriya klawan Buta Cakil. Ksatriya kuwi minangka tokoh kang apik kang sipaté
lemah lembut, Buta Cakil nggambaraké tokoh kang kasar. Ing pakeliran wayang Kulit, adhegan perang kembang iki biasané metu ana ing
tengah-tengah utawa ing wayah Pathet Sanga.Amarga ing
pathet sanga para miyarsa biasané wis mulai bosen karo adhegan-adhegan caturan,
mula Dhalang tanggap banjur ngisi adhegan perang kembang
iki. Perang antarané Ksatriya (Bambangan) klawan Cakil iki pancèn atraktif,
ing kono uga bisa dadi papan pambiji kanggo dhalang ing bab njogètké wayang.
Tokoh Bambangan kuwi ora nunjuk salah sawijining tokoh tertamtu kayata Bambang Irawan, Bambang Priyambada, Bambang Wijanarka, Bambang Wisanggeni, Bambang
Swatama, Bambang Senggotho, lan liya-liyané. Ing pakeliran Wayang Kulit lan Wayang wong tokoh bambangan biasané luruh artiné rainé nunduk (ora ndengak) prawakan cilik (mbambang). Bambangan kuwi
minangka simbolisasi saka tokoh
ksatria kang pasuryané gantheng kang sarwa alus ing sabarang solahé, kayata:
solah bawa, wicara, pocapan, lan budi pekertiné.
Tokoh-tokoh
ksatriya kang kagolong bambangan yaiku antarané:
1. Sumantri,
2. Rama,
3. Laksmana,
4. Palasara,
5. Pandu,
6. Arjuna,
7. Abimanyu,
8. Irawan, lan
9. Priyambada.
Tokoh-tokoh
wayang gagah kaya déné:
1. Gandamana,
2. Salya,
3. Bima,
4. Gathutkaca,
5. Antareja,
6. Kakrasana,
kuwi ora
bisa disebut bambangan, sanajan kagolong ksatriya.
Gandhèng cènèngé karo perang kembang utawa Bambangan-Cakil, tokoh-tokoh
gantheng kang prawakan cilik lan rainé ndengak (tradisi wayang nyebutké
"longok" utawa "lanyapan") ora bisa disebut bambangan
kayata:
1. Karna,
2. Nangkula,
3. Sadewa,
4. Truthajumena,
5. Narasoma,
6. Narayana,
7. Wisanggeni, lan
8. Samba.
Tidak ada komentar:
Posting Komentar